Isotermiese hoёdruk-vloeistof-gas-ewewigsdata vir die C₂F₄-C₃F₆–s-C₄F₈ binêre stelsels word voorgelê. Die binêre stelsel vorm deel van navorsing vir die produksie van hoë-suiwerheid-C₂F₄ en C₃F₆ vanaf gedepolimiseerde Teflon. Die suiwer C₂F₄ en suiwer C₃F₆ word in polimerisasie-reaksies gebruik om fluoro-polimere te produseer. Vir die C₂F₄-C₃F₆- en die C₂F₄-s-C₄F₈-stelsels is drie isoterme by 248 K, 263 K en 283 K gedoen. Drie isoterme by 293 K, 323 K en 352 K is vir die C₃F₆-sC₄F₈-stelsel gedoen. Die drukreeks ter sprake vir al drie stelsels was in die gebied 0.03 tot 2.74 MPa. ’Staties-analitiese’ toerusting is vir die eksperimentele werk gebruik. Die ewewigsfases is geanaliseer in ’n kapilêrebuisstelsel wat elke fase afsonderlik kan meet. Die onsekerheid in die kalibrering is ± 0.1 K, 0.0015 MPa en 2% vir die temperatuur, druk en molfraksies onderskeidelik. Die eksperimentele data is daarna op die Peng-Robinson toestandsvergelyking gepas met gebruikmaking van die Mathias-Copeman-alfafunksie. Die Wong-Sandler-vermengingsreël, saam met die NRTL aktiwiteitskoëffisient-model, word gebruik. Die gemiddelde relatiewe afwyking tussen die model en eksperimentele data word ook voorgestel. Die data kan gebruik word om ’n distillasiekolom te ontwerp wat die benodigde suiwerheid in die produkte kan produseer.