Die doel van hierdie studie was eerstens om te sien of die vloeibare afvalstowwe, afkomstig vanaf die varkplaas, enige invloed op die chemiese kwaliteit van Vaalrivierwater gehad het en tweedens, om te bepaal of daar enige veranderinge in die samestelling en biodiversiteit van algbevolkings voorgekom het na toevoeging van hierdie afvloeiwater.

Drie versamelpunte is in die rivier geïdentifiseer, naamlik ’n punt stroom-op van die varkplaas, ’n punt by die varkplaas en ’n punt stroom-af van die varkplaas. Watermonsters is elke tweede week vir ’n tydperk van drie maande by die verskillende versamelpunte geneem. Veranderlikes soos pH, geleiding en suurstofkonsentrasie is op die perseel gemeet deur gebruik te maak van ’n Hydras 3LT Multi Parameter Data Sond. Stikstofkonsentrasies en soutgehalte-bepalings is in die laboratorium gedoen. Vir die alg-analises is die watermonsters met formaldehied gefikseer, die gasvakuole van blou-groen bakterieë is gebreek en daarna is die alge met behulp van ’n omgekeerde ligmikroskoop geïdentifiseer en getel. ’n Verskeidenheid algspesies het tydens die studie in die rivier voorgekom en die aantal spesies het by verskillende versamelpunte verskil. Die hoogste spesiediversiteit is in die monsters wat by die varkplaas geneem is, gevind. Merkwaardig is dat blou-groen bakterieë (goeie aanduiders van besoedeling) feitlik afwesig was stroom-op van die varkplaas, maar dat dit wel by die varkplaas versamelpunt, sowel as stroom-af daarvan, voorgekom het. Chemiese resultate het aangetoon dat ammonium (NH₄⁺), nitraat (NO₃^-) en kalium (K⁺) konsentrasies stroom-af afgeneem het, terwyl nitriet (NO₂^-), sulfaat (SO₄²⁺) en chloried (CI^-) konsentrasies stroom-af toegeneem het. Die studieperiode was egter gekenmerk deur vloede en die hoë vloeitempo in die rivier kon moontlik, as gevolg van ’n verdunningseffek, die voedingstofkonsentrasies beïnvloed het.