Hierdie studie was uitgevoer deur twee eksperimente waar een generasie B. tropicus blootgestel is aan beide Bt-mielieblare en nie-Bt mielieblare in gekontroleerde laboratorium toestande. Die toetsgroepe was alleenlik die onderskeie mielieblare gevoer, die kontrole groep was egter viskos gevoer. Die laboratorium se temperatuur was gereguleer by ʼn konstante 26 °C. Die resultate dui op ‘n afname in eierpakkiegroottes by die groepe wat blootgestel is aan die Bt-toksien. Die koers waarteen eierpakkies daagliks gelê is toon ook ‘n vermindering in die blootgestelde groepe. Van die embrios wat blootgestel is aan die Bt-toksien is 40% se ontwikkeling geïnhibeer. Aangesien die embrios nie voed tydens ontwikkeling nie, kan hierdie verskynsel toegeskryf word aan die Bt-toksien in oplossing. Nadat die embrios uitgebroei het toon die kontrolegroep ‘n betekenisvolle verskil in groeikoers. Daar is geen betekenisvolle verskil gevind tussen die groepe wat blare (beide nie-Bt en Bt) gevoer is se groei nie. Die moontlikheid bestaan dat daar verskille is in voedingswaardes van die verskillende kultivars. Die nie-Bt mielieblare en Bt-mielieblare wat tydens hierdie studie gebruik was, was nie isolyne van mekaar nie. Studies wat tans onderneem word gebruik isolyne van dieselfde kultivars om verdere effekte te bepaal.