Die reservaat is suid-wes van die dorp Rustenburg geleë en is in 1974 geproklammeer. Dit beslaan die noordelike hange en kruin van die Magaliesberg. Die reservaat word oorheers deur rotsagtige riwwe met beboste klowe teen die ruwe hellings. Die Waterkloof Rivier het hier sy oorsprong en loop deur ’n rietvlei en ’n groot valleikom. ’n Uitgebreide plato vorm ’n belangrike wateropvanggebied vanwaar die hoof waterstroom in ’n rietmoeras vloei. Die Kgaswane Bergreservaat val binne die Savanna Bioom, ’n plantegroei tipe waarvan gras en bome die belangrikste komponente uitmaak. Hierdie bioom beslaan presies die helfte van Afrika se landoppervlakte en omtrent 35% van Suid-Afrika se landoppervlakte. Alhoewel die Kgaswane Bergreservaat as suurbosveld beskou word, varieer die plantegroei van grasland, struike, gemengde bome en selfs tot verspreide kolle fynbos. Die reservaat is geleë in die somer-reënval gebied met reën in die warm somermaande, koel droë winters en feilik die heel jaar sonskyn. Somertemperature wissel van 22 °C en 35 °C, die gemiddelde temperature van Mei tot Julie is 16 °C, maar dit kan ook wissel tussen 2 °C en 20 °C op een dag.

Spinnekoppe is een keer per maand oor ’n tydperk van vier jaar vanaf verskeie habitatte, soos gras en struike (met swaainette) en bome (met boomslaan tegniek), versamel. Aktiewe versameling van klipbewoners en webbouers is ook gedoen. Die versameling sluit min grondbewoners in omdat geen putvalle uitgesit is nie. Met sulke lang termyn versamelings neem dit enkele jare om al die eksemplare tot spesievlak geïdentifiseer te kry.

Die Kgaswane Bergreservaat het ’n ryk fauna en die meer as 1500 spinnekoppe wat versamel is, verteenwoordig 159 spesies van 106 genera en 38 families. Die krapspinnekoppe van die familie Thomisidae is die mees diverse familie teenwoordig met 35 spesies (22% van die totaal), gevolg deur die wawielwebspinnekoppe van die Araneidae met 26 spesies (16% van die totaal) en die grondspinnekoppe van die Gnaphosidae met 16 spesies (10%). Die meerderheid spesies (100) is dwaalspinnekoppe (63%) terwyl 59 spesies (37%) webbouers is. ’n Totaal van 128 spesies is nuwe rekords vir Kgaswane Bergreservaat en 8% van die Suid-Afrikaanse spinnekopspesies word reeds in hierdie reservaat beskerm.